RICORDI DI MORI E MONTE ALBANO

L’è tant che ghe penso al me paès

en do som nata endove che ò passà

i pu bei ani de la me infanzia

doveria tornarghe pu de spes

a trovàr i parenti e a vardàr

en tuti sti ani i cambiamenti….

Mi son lontana, però ‘l penso lostès.

 

Me ricordo e l’e en gran bel ricordo

che me porto da sempre dentro al cor

quela cesata, a Mori, sora al mont,

me vegn en ment, quando a Monte Albano

el disnove de màrz per S. Giuseppe

se neva tuti quanti en processiòm

lassù a Messa e a  la comuniòm.

 

De matina bonora se partiva

dal Zochel, Molina, Mori-Vecio

tut el paèse l neva a festegiàr

con quei de Lopi e anca de la val.

Per noi la strada, l’era longa for da “lambel”

El sentèr l’era stret e pièm de sassi

ghe voleva per nar do bone gambe

ma erem contenti e anca se strachi

noi puteloti, corevem sempre avanti.

 

Quando arivevem su la scalinaa

contevem i scalini e i era tanti

e po’ se no basteva tuti quanti

ne rampeghevem su quei grossi sassi

franai, a so temp, zò da la montagna.

 

Sul sas pu gros ghe neva su la banda

a sonàr, per quela festa granda.

Dopo la Messa, dopo aver pregà

tuti  sentai fora per el pra

tuti’nsieme se feva colaziòm

coi biscoti, paneti, e con en pom.

 

Me ricordo, che propri drio a la cesa

Ghera “el bus del Barbazza”

Che ancoi fa rider, ma alòr me spaventava

Me conteva me mama  pora dona

che quela vècia, strova galeria

la partiva lì da la Madona

e l’ariveva fim a Vilanova

e dentro “la me conteva su”

 

Ghera en vècio Barbalonga con en sach

che ‘l porteva via i popi

che no obediva pu.

 

Ricordi e ancòr ricordi

me afiora ne la ment

forse l’è mèio scriverli

prima che i resta gnent

 

ricordi bei… e bruti…

l’è la sorte de tuti

quando che passa i ani

 

zercàr de ricordàr

posti e amizi lontani.

 

 

Maria Meneghini Salemi    

 

 

 

Tratto da “El Campanò de San Giuseppe “ anno 1994  stampato da “ La Grafica  Mori (TN) “